Lokal tíðindi Tíðindi

Gamligarður handaður Kunningarstovuni

Jógvan Skorheim, borgarstjóri handaði í dag Elsu Poulsen, leiðara á Visit Norðoy gistingarhúsið í Svínoy – Gamlagarð – at umsita vegna kommununa.

Tað var ein ovurfegin borgarstjóri, sum í dag vitjaði í Svínoy, har Útoyggjastevna er á skránni leygardagin. Eyðun Jacobsen er nevndarlimur í Svínoyarnevnd Býráðsins og harumframt staðbundin maður hjá kommununi í oynni, og hann tók ímóti í Gamlagarði, har hond nú verður lagt á seinastu snøklarnar við innrætting og øðrum.

Byggiverkætlanin Gamligarður hevur vart í nógv ár, og seinastu tíðina er nógv lagt fyri at fáa húsið klárt til summarið og tað nógva ferðvinnuvirksemið, sum fylgir við hesi árstíðini. Í dag stendur bygningurin so at siga klárur at taka í nýtslu. Gamligarður er innrættaður við átta kømrum, stórum felagsrúmi og køki. Upp til fýra sovipláss eru á hvørjum kamari, og hvørt kamar hevur eisini egið wc og bað. Sostatt fáa upp til 32 fólk gist í Gamlagarði í senn, og hetta ger bygningin sera væl hóskandi til eitt nú starvsfólka-, bólka- og felags familjutúrar.

– Kenslan av endiliga at vera komin á mál við Gamlagarði er heilt einastandandi. Húsið stendur snøgt og væl í bygdini, og karmarnir eru av besta slag, og eg eri fullvísur í, at hetta er tilboð, sum nógv kunnu hava áhuga í. So hetta er eitt stórt framstig, ikki bara fyri ferðavinnuna í oynni, men fyri Norðoyggjar sum heild, tí hetta víðkar um møguleikarnar í bygdini og hækkar samstundis um støðið á tilboðum og tænastum í Norðoyggjum yvirhøvur, sigur Jógvan Skorheim, borgarstjóri.

Vegna Klaksvíkar kommunu handaði hann í dag Elsu Poulsen, leiðara á Visit Norðoy Gamlagarð at umsita vegna kommununa. Kunningarstovan fer sostatt at umsita bíleggingar og tilboð í Gamlagarði, og verður hetta nú skipað í samráð við bygdafólkið í Svínoy. Umsitingaravtalan millum kommununa og Visit Norðoy er í fyrsta umfari galdandi í eina royndartíð uppá eitt ár, áðrenn skipanin verður eftirmett.

Í Svínoy eru fyrireikingarnar til Útoyggjastevnuna væl og virðiligar byrjaðar, og nýggjasta frambrotið í bygdini verður karmur um fleiri áhugaverd tiltøk á skránni. Fyrsta almenna tiltak í Gamlagarði yvirhøvur verður ókeypis morgunmatur kl.9, og síðan er aðalfundurin hjá Útoyggjafelagnum á skránni. Aðalfundurin byrjar leygarmorgunin kl. 10.30.

Her myndir frá handaðini, klikk her “Myndir Gamligarður handaður Kunningarstovuni”.

Kelda: www.klaksvik.fo

SáH

Grillin hjá Símun - Maverick
Símun á Høvdanum
Hjálp News.fo og Norðoya Portalin at gerast enn betur. Send okkum tíðindir, lýsingar og hava tit hug at stuðla fíggjarliga, eru tit vælkomin at senda eina upphædd á konto 6460 382.440.50 ella 9865 9927330. Símun er myndamaður og ein sannur miðlamaður. Hann tekur myndir og skrivar greinar av/um ymisk tiltøk, og tilber eisini at bíleggja eina myndatøku ella greinaskriving, send ein teldupost á simun@news.fo um tú veist eina góða søgu, ella vilt hava tikið myndir av onkrum ávísum.

Skriv et svar

Din e-mailadresse vil ikke blive publiceret.