Heilsuverkið Tíðindi

Dreingir fáa tilboð um ókeypis koppseting fyri HPV

Eftir ætlan fáa dreingir, sum eru 12 ár, tilboð um ókeypis koppseting fyri HPV í summar. Játtan er á fíggjarlógini fyri 2019 til endamálið.

Málið um HPV-koppseting til dreingir hevur javnan verið á breddanum, síðani tilboðið til gentur varð sett í gildi í 2009. Hjá gentum er koppsetingin serliga fyri at sleppa undan lívmóðirhálskrabba seinni í lívinum.

Fleiri av okkara grannalondum hava seinnu árini gjørt av, at tilboðið eisini eigur at fevna um dreingir, tí koppsetingin vísir seg at hava fleiri fyrimunir fyri heilsuna hjá dreingjum eisini, bæði í mun til ávís sløg av krabbameini og aðrar sjúkur.

Sirið Stenberg, landsstýriskvinna í heilsumálum fegnast um, at Løgtingið hevur samtykt at játta pening til at víðkað tilboðið í Føroyum. Í summar fáa 12 ára gamlir dreingir sostatt tilboð um at verða koppsettir ókeypis fyri HPV. Ætlan skal eisini gerast fyri, hvussu dreingir, ið eru eldri enn 12 ár, somuleiðis kunnu fáa tilboð um ókeypis koppseting fyri HPV.

Gongur nógv betri at fáa gentur at koppseta seg
Í Føroyum fóru vit undir at koppseta gentur fyri HPV ókeypis tann 1. januar 2009. Byrjað varð við gentum, sum vóru fyltar 14 ár, og seinni varð tilboðið víðkað til gentur niður í 12 ár. Eins og í Danmark fall talið av gentum, ið lótu seg koppseta, ógvusliga í nøkur ár, men nú tykist gongdin verða vend.

Í fjør vóru tað 409 gentur, sum fingu fyrstu koppseting fyri HPV. Hetta er á leið sama tal, sum tey fyrstu árini, ið tilboðið varð tókt. Í 2016 vóru tær bara 96. Sí eisini talvu ovast.

UM HPV KOPPSETING
Í dag er tað soleiðis, at gentur og kvinnur, sum eru føddar 1. januar 1985 ella seinni, kunnu, tá tær hava fylt 12 ár, verða koppsettar ókeypis ímóti HPV-virus. Koppsetingin skal verða framd innan kvinnan fyllir 28 ár

Kelda: himr.fo

Símun á Høvdanum
Hjálp News.fo og Norðoya Portalin at gerast enn betur. Send okkum tíðindir, lýsingar og hava tit hug at stuðla fíggjarliga, eru tit vælkomin at senda eina upphædd á konto 6460 382.440.50 ella 9865 9927330. Símun er myndamaður og ein sannur miðlamaður. Hann tekur myndir og skrivar greinar av/um ymisk tiltøk, og tilber eisini at bíleggja eina myndatøku ella greinaskriving, send ein teldupost á simun@news.fo um tú veist eina góða søgu, ella vilt hava tikið myndir av onkrum ávísum.

Skriv et svar

Din e-mailadresse vil ikke blive publiceret. Krævede felter er markeret med *